Todas as paredes – 3

Ti pensas que alguén podería morder a ese home ata matalo? Ti pensas que alguén podería matalo dese xeito? Miraches as fotos? Primeiro arrincáronlle a cara a dentadas, e logo quen llo fixo arrincoulle medio pescozo! Morreu desangrado! Pensas que alguén pode estar tan tolo! Alí dentro hai homes que teñen feito verdadeiras salvaxadas. Ben o sei. Pero iso… E ademais, os forenses dixeron que as feridas coincidían cos dentes dun can…

Todas as paredes – 2

—Unha semana máis tarde o pai perdeu o control. Tiña problemas no traballo. Querían botar á metade da xente e supoño que sabía que ía ser un dos que quedaba na rúa. O tipo, polo que teño escoitado, traballaba ben pero era un barulleiro. A noite anterior cruceime con el. Estaba tan borracho que tiña que agarrarse aos coches. Fixen como que non o miraba. Daba moito noxo.

Todas as paredes – 1

—Non sei si serei quen de explicarcho. É todo un pouco confuso… A ver, o can simplemente apartaba ao vello, saltaba sobre el, pero non era un ataque. Non estaba rabioso nin alterado. Nada diso. Non ladrou nin unha vez. Nin lle gruñiu. Só abría a boca un chisco e ensinaba as moas. Semellaba que lle dicía “Mírame os dentes. Se quixera, trabábate con eles, pero non quero, non che vou facer nada.”